La vischnaunca ademplescha las incumbensas che sepresentan ad ella en favur dil beinstar dalla communitad. Ella promova il svilup cultural ed economic, il beinstar social e general da sias habitontas e da ses habitonts sco era il manteniment persistent dallas basas da viver natiralas.
La legislativa fuorma dad ina vart la cuminonza dils votants e da l'autra vart il parlament communal. Las mintgamai cumpetenzas ein stipuladas ella constituziun dalla vischnaunca Ilanz/Glion. La cuminonza dils votants excercitescha ses dretgs all'urna. Il parlament communal seraduna per regla sis gadas ad onn. La suprastonza communala ei l'autoritad administrativa e da polizia dalla vischnaunca e responsabla per la direcziun strategica. L'executiva e secumpona dalla presidenta ni dil president e da quater ulteriurs commembers. L'administraziun cumpeglia las partiziuns canzlia, finanzas, planisaziun e construcziun, menaschis communals e scola. Ella vegn menada dalla direcziun, che consista dalla presidenta communala ni dil president communal sco era dallas menadras e dils menaders dallas partiziuns.
Las autoritads ed ils emploiai capeschan lur incumbensas sco survetsch alla communitad. Finamira ei, a moda raschuneivla cun respectar aspects economics ed il mieds finanzials disponibels, d'exequir las lavurs effectivamein ed a moda cunvegnenta per cuntentientscha dallas vischinas e dils vischins, da hosps ed interpresas.
