Realisaziun dil maletg empalont dil spazi communal MTC e la dimensiun dallas zonas da baghegiar
Procedura da participaziun 21-10 entochen 21-11-2024
Ils 9 da fevrer 2020 ei l'emprema etappa dalla revisiun totala dalla planisaziun vegnida decidida all'urna. L'approbaziun entras il cantun ei succedida cun la decisiun dalla Regenza dils 12 d'october 2021 (protocol nr. 874/2021). Naven dils 12 d'october 2021 dispona la vischnaunca dad Ilanz/Glion per l'emprema ga sur d'ina planisaziun locala unificada e harmonisada per tuttas anteriuras vischnauncas.
Cun la secunda etappa uss actuala duei la revisiun totala vegnir menada alla fin. Ils cuntegns centrals ein l'adattaziun dalla dimensiun dallas zonas da baghegiar tenor las prescripziuns dil dretg surordinau e dalla planisaziun sco era l'implementaziun dil maletg empalont dil territori communal (MTC). Plinavon ston las pendenzas dall' emprema etappa dalla revisiun totala vegnir liquidadas tenor disposiziun dalla Regenza.
La vischnaunca dad Ilanz/Glion ha - viu sur igl entir territori - zonas da baghegiar memia grondas e sto ord quei motiv redimensiunar quellas. Las singulas fracziuns ein pertuccadas differentamein da quella malemperneivla mesira, ch'ei denton prescretta dallas leschas surordinadas dalla planisaziun dil terren. La vischnaunca ha saviu secunvegnir cun il cantun, che mintga fracziun vegn tractada separatamein. Aschia dat ei negin aschinumnau "castitg da fusiun", entras il qual ils habitonts dad ina fracziun stuessan "star botta" per las enzonaziuns memia generusas d'ina autra fracziun. Ultra da quei ei vegniu risguardau, che mintga fracziun disponi aunc d'in cert diember da parcellas buca surbaghegiadas.
Semplamein ignorar l'obligaziun d'adattar las zonas da baghegiar ei negina sligiaziun. Autras vischnauncas han gia empruau d'ir quella via ed ein vegni curregi entras il cantun. Sche la vischnaunca prevesa buc las exzonaziuns necessarias, vegn il cantun a relaschar perfaktisch las parcellas ch'ein tenor sia vesta adattadas per ina exzonaziun ina zona da planisaziun, quei vul dir ch'ei vegn facticamein ordinau in scamond da baghegiar per quellas parcellas. La zona da planisaziun resta aschi ditg en vigur, entochen che la vischnaunca ha adempliu sia obligaziun d'adattar feslas zonas da baghegiar.
Per finir ei da remarcar, che questas exonaziuns da terren da baghegiar ein buca per la perpetnadad. En cass che las reservas da terren da baghegiar ein en ina fracziun druvadas si per gronda part suenter entgins onns, sa la vischnaunca proponer al cantun en ina revisiun parziala da puspei enzonar novas parcellas, aschia che parcellas exzonadas san puspei vegnir risguardadas.
Actas d'exposiziun:
- Tut ils documents dalla revisiun parziala dalla planisaziun locala
- Plans enzonaziuns, exonaziuns e midadas da zonas
- Plans plazs da baghegiar
- Survesta taxa sin plivalur e mobilisaziun dil terren da baghegiar 1:2'000 Castrisch
- Survesta taxa sin plivalur e mobilisaziun dil terren da baghegiar 1:2'000 Ilanz
- Midadas dalla lescha da baghegiar
- Rapport da planisaziun e participaziun
- Plan da master areal Fistez
- Structuras da spazi da viver per amfibis e reptils sin territori communal dad Ilanz/Glion ella vischinonza da habitadis (rapport tier la cartaziun)
- Definiziun dil spazi d'auas dalla vischnaunca Ilanz/Glion (rapport accumpignont dalla actualisaziun digl october 2022)
- Survesta capacitad dallas zonas da baghegiar en vigur legala, stan uost 2024
- Survesta capacitad dallas zonas da baghegiar dalla revisiun, stan uost 2024
- Evaluaziun dil rapport d'examinaziun preliminara dil cantun
