La lescha davart las ustrias dalla vischnaunca Ilanz/Glion regla las lubientschas, ils temps d'avertura sco era las taxas per exequir activitads d'ustria ella vischnaunca per mantener il ruaus public, igl uorden e la segirtad sco era per schurmegiar la giuventetgna.
La damonda per la cumpartgida d'ina lubientscha tenor art. 3 dalla lescha d'ustrias dil cantun Grischun (LU, DG 945.100) ei d'inoltrar alla vischnaunca silmeins in meins avon l'avertura ni la surprendida dil menaschi d'ustria. Sin basa digl art. 3 dalla lescha d'ustria dil cantun Grischun ei ina lubientscha necessaria per:
- vender spisas ni bubrondas per il consum el liug;
- surschar localitads per il consum da spisas ni da bubrondas atgnas ni furnidas.
Per la realisaziun dad eveniments ed occurrenzas dad in ni plirs gis sco ustrias occasiunalas ni da fiastas nua ch'ei vegn consumau atgnas spisas ni bubrondas ni talas che vegnan furnidas, drov'ei ina lubientscha dalla vischnaunca. Per dar giu spisas e bubrondas en spazi privat e serrau drova ei medemamein ina lubientscha aschinavon che quei succeda a moda commerciala.
